ବିଜୁ କୃଷକ ବିକାଶ ଯୋଜନା (BKVY)

ଓଡିଶା ସରକାର କୃଷି ଓ କୃଷକର ଉନ୍ନତି ପାଇଁ ୨୦୦୧-୦୨ମସିହା ଠାରୁ ରାଜ୍ୟରେ ବିଜୁ କୃଷକ ବିକାଶ ଯୋଜନା (BKVY) ପ୍ରଣୟନ କରିଛନ୍ତି । ଉକ୍ତ ଯୋଜନା ଅନୁଯାୟୀ, ରାଜ୍ୟରେ ଥିବା ସମସ୍ତ ପ୍ରାକୃତିକ ନଦୀ, ନାଳ ଓ ଝରଣାରୁ ବୋହିଯାଉଥିବା ଜଳ ଓ ଭୂଗର୍ଭରେ ଥିବା ଭୂତଳ ଜଳକୁ ବ୍ୟବହାର କରି ଜଳସେଚନର ସୁବିଧା କରାଯାଉଅଛି । ଉକ୍ତ ଜଳ ଉତ୍ସ ନିକଟରେ ଏକ ଉଚ୍ଚ ଶକ୍ତି ସମ୍ପନ୍ନ ବିଦ୍ୟୁତ ମୋଟର ବସାଯାଇ ଚାଷଜମିକୁ ପାଣି ଯୋଗାଇ ଦିଆଯାଉଛି ।

ଯୋଜନା କାର୍ଯ୍ୟକାରୀ ସମ୍ବନ୍ଧେ :

ଉକ୍ତ ଯୋଜନାରେ ଏକାଧିକ ଚାଷୀ ମିଳିତ ହୋଇ ଏକ ପାଣି ପଞ୍ଚାୟତ କମିଟି ଗଠନ କରି ନୂତନ ପ୍ରକଳ୍ପ ପ୍ରତିଷ୍ଠା କିମ୍ବା ଅଚଳ ହୋଇ ପଡିଥିବା ଉଠାଜଳସେଚନ ପ୍ରକଳ୍ପକୁ ସଚଳ କରିବା ପାଇଁ ଏକ ଆବେଦନ ପତ୍ର ଜିଲ୍ଲା ପାଳ ମହୋଦୟଙ୍କ ନିକଟକୁ ପଠାଇଥାନ୍ତି । ଉକ୍ତ ପ୍ରକଳ୍ପ ପାଇଁ ସମସ୍ତ ଚାଷୀମାନଙ୍କର ଚାଷ ଜମି ୧୦ ଏକରରୁ ୧୦୦ ଏକର ମଧ୍ୟରେ ରହିବା ଉଚିତ । ଏହା ସହିତ, ନିକଟରେ ୧୧ କେଭି ବିଦ୍ୟୁତ ତାର ରହିବା ସହ ନଦୀ କିମ୍ବା ନାଳରେ ଯଥେଷ୍ଟ ଜଳ ଥିବା ଉଚିତ । ଚାଷୀମାନେ ସେମାନଙ୍କ ପ୍ରକଳ୍ପ ମୂଲ୍ୟର ୨୦ ଶତାଂଶ ( କିମ୍ବା ୧୦ ଶତାଂଶ KBK / TASP / DPAP ଅଞ୍ଚଳ ଚାଷୀଙ୍କ ପାଇଁ ଉଦ୍ଦିଷ୍ଟ ) ଦେବା ନିହାତି ଜରୁରୀ ଅଟେ । ଚାଷୀମାନେ ଉକ୍ତ ୨୦ କିମ୍ବା ୧୦ ଶତାଂଶ ଦେୟ ବାବଦକୁ ପ୍ରକଳ୍ପରେ ବ୍ୟବହାର ହେଉଥିବା କରନାଳୀ କରିପାରିବେ କିମ୍ବା ପ୍ରକଳ୍ପପାଇଁ ଆବଶ୍ୟକ ହେଉଥିବା ଜମି କିମ୍ବା ପ୍ରକଳ୍ପର କାର୍ଯ୍ୟ ସମୟରେ ମଜୁରି ବାବଦ ଦେୟ ଦେଇପାରିବେ କିମ୍ବା ଆବଶ୍ୟକ ପଡିଲେ ସମସ୍ତ ଉପଭୋକ୍ତାମାନେ ମିଶି ନଗଦ ରାଶି ମଧ୍ୟ ଦେଇପାରିବେ ।

ଚାଷୀମାନଙ୍କର ଏହି ଆବେଦନ ପତ୍ରଟିକୁ ଜିଲ୍ଲା ପାଳ ମହୋଦୟ ଉଠା ଜଳସେଚନ ନିର୍ବାହୀ ଯନ୍ତ୍ରୀଙ୍କ ନିକଟକୁ ସରଜମିନ ତଦନ୍ତ ପାଇଁ ପଠାଇଥାନ୍ତି । ନିର୍ବାହୀ ଯନ୍ତ୍ରୀ ତୁରନ୍ତ ଉକ୍ତ ପତ୍ରଟିକୁ ତାଙ୍କ ଅଧୀନରେ ଥିବା ସହକାରୀ ଯନ୍ତ୍ରୀ / କନିଷ୍ଠ ଯନ୍ତ୍ରୀଙ୍କୁ ପ୍ରକଳ୍ପର ଉପଯୁକ୍ତ ସମ୍ଭାବନା ସମ୍ବନ୍ଧରେ(Feasibility) ଜଣାଇବା ପାଇଁ ନିର୍ଦେଶ ଦେଇଥାନ୍ତି । ଉଠା ଜଳସେଚନର ଅଧିକାରୀମାନେ ଆବେଦନକରିଥିବା ପତ୍ରଟିକୁ ଗ୍ରାମକୁ ନେଇ ସେହି ଚାଷୀମାନଙ୍କୁ ଭେଟି ପ୍ରକଳ୍ପ ହେବାକୁଥିବା ଉଦ୍ଦିଷ୍ଟ ସ୍ଥାନକୁ ଯାଇ ନଦୀ କିମ୍ବା ନାଳରେ ପାଣି, ବିଦ୍ୟୁତ ଶକ୍ତିର ସହଜ ଲଭ୍ୟତା (ପ୍ରାପ୍ୟତା) ସମ୍ବନ୍ଧରେ ଅନୁଧ୍ୟାନ କରିଥାନ୍ତି । ଏହା ସାଫଲ୍ୟ ହେଲେ, ପ୍ରକଳ୍ପ କାର୍ଯ୍ୟର ଅଗ୍ରଗତି ଘଟେ, ନଚେତ ଏହାକୁ ଅସଫଳ ବୋଲି ଗ୍ରହଣ କରାଯାଇଥାଏ । ଭୂତଳ ଜଳ ସମ୍ବନ୍ଧରେ ଓଡିଶା ଉଠା ଜଳସେଚନ ନିଗମ, ଭୂତଳ ଜଳ ସର୍ଭେ ଓ ଅନୁସନ୍ଧାନ ବିଭାଗର ସାହାଯ୍ୟ ନେଇଥାଏ ।
ବିଜୁ କୃଷକ ବିକାଶ ଯୋଜନା ଅନ୍ତର୍ଗତ ୨ଟି ଅଲଗା ଅଲଗା ସ୍ଵତନ୍ତ୍ର ଯୋଜନା ରହିଅଛି । ଏଗୁଡିକ ହେଲା:-
(କ) ) ବିଜୁ କୃଷକ ବିକାଶ ଯୋଜନା (ନାବାର୍ଡ ସହାୟତା)- BKVY (RIDF)
(ଖ) ବିଜୁ କୃଷକ ବିକାଶ ଯୋଜନା (କେବିକେ ଜିଲ୍ଲା ଗୁଡିକ ପାଇଁ କେନ୍ଦ୍ର ସରକାରଙ୍କ ସ୍ଵତନ୍ତ୍ର ସହାୟତା) - BKVY (SCA)